Pakistan

Pakistan (Urdu: پاکستان ; amtlich Islaamsche Republiek Pakistan) is en Staat in Süüdasien. De grenzt an den Iran, Afghanistan, China as ok an de indisch Bundsstaaten Jammu un Kaschmir, Punjab, Rajasthan un Gujarat (mit de Klock, anfungen in’n Westen). In’n Süüden hett Pakistan Andeel an de Küst vun dat Arabisch Meer, en Nebenmeer vun de Indische Ozeaan. De Staat Pakistan is an 14. August 1947 entstahn ut de mehrheetlich muslimisch Delen vun Britisch-Indien. De anner Rebeden mit hinduistisch oder anner Mehrheet un de gröttste Deel vun dat överwegend muslimisch Kaschmir sünd domals nah Indien fallen. 1956 hett sik Pakistan to de eerste Islamisch Republik up de Eer utropen. De ehmalge Landesdeel Oostpakistan is siet 1971 as Bangladesch unafhängig. In Pakistan leevt hüdigendags (2015) bi 199,1 Mio. Minschen up 880.254 km².